Agnes Tveit
Journalist Agnes Tveit skal dekke det tradisjonsrike Smalahovesleppet pÄ Voss for lokalavisa dÄ ho fÄr auge pÄ eit menneskehovud blant saueskallane. Den pÄtroppande ordfÞraren pÄ Voss, tidlegare TV-kjendis og heimflytta vossing Sjur Dagestad, dukkar ikkje opp til opninga av Smalahovesleppet. Men hovudet hans gjer det. Det blir funne i festivalteltet, skilt frÄ resten av kroppen. Kven har tatt livet av - og halshogd - den populÊre politikaren? Agnes Tveit, som er tilbake i avisa Hordaland og motvillig nÊrmar seg sin eigen 40-Ärsdag, var truleg den siste som prata med Dagestad dÄ ho portrettintervjua han dagen fÞr. Ho kastar seg ut i ei etterforsking som avdekker stygg maktkamp, politiske fiendskap og alvorlige truslar. Jo tettare Agnes kjem pÄ drapssaka, jo fleire truslar blir retta ogsÄ mot henne. Skallebank er Randi Fuglehaug sin tredje frittstÄande krimroman med handling frÄ vakre Voss. Hennar fÞrste roman, Fallesjuke, vann Mauritz Hansen-prisen «Nytt blod» for beste norske krimdebut.
